Siman di Kultura

Siman di Kultura

Di 24 di sèptèmber te ku 1 di òktober Kas di Kultura ta organisá Siman di Kultura 2017, ku e tema sentral ‘Willemstad, 20 aña riba lista di patrimonio mundial’.
Mirando e entusiasmo di hinter komunidat di Kòrsou pa laga Kultura i Arte di Kòrsou sigui brota den tur skina, Kas di Kultura a tuma e desishon pa den estrecho koperashon ku hinter komunidat di Kòrsou, hasi tur loke ta posibel pa presentá Siman di Kultura.
E lema pa Siman di Kultura ta Hasi grandi bo Kultura , Alsa bo Nashon.
Meta di Siman di Kultura ta entre otro:
o Promové i stimulá kreatividat i kultura di Kòrsou
o Pone atenshon dirigí riba diferente forma di manifestashon di kultura di Kòrsou
o Pone atenshon na kultura di Pasado, Presente i Futuro
o Stimulá i Apoyá kultura di Kòrsou den seno familiar, den bario, organisashon i artista
pa organisá evento kultural artístiko
o Konosé i rekonosé sitio históriko di bario komo patrimonio nashonal
o Rebibá e sinergia den i entre barionan di Kòrsou
o Promové kontakto entre generashon nan den bario
o Mobilisá hinter komunidat pa partisipá i asistí na diferente evento i aktividat kultural
o Promové union bou di tur suidadano
E aña aki Kas di Kultura ta reta bo pa ta proaktivo i kreativo. Nos ke organisá Siman di Kultura den estrecho koperashon ku abo ku ta vibra di ideanan ku por Hasi Grandi Nos Kultura i Alsa Nos Nashon.
Riba e fecha di 24 di sèptèmber 2017 Kas di Kultura mes ta organisá e apertura di e siman i riba djadumingu 1 di òktober 2017 e klousura di e siman.
Pa tur otro dia Kas di Kultura ta hasi un yamada na tur famia, radio emisora, kanal di televishon, skol, empresa di gobièrnu, empresa privá, instituto, grupo kultural, artista i prinsipalmente nos barionan, pa pensa aktividatnan pa organisá durante Siman di Kultura, parti mainta, parti atardi i tambe anochi.
Barionan ku tin organisashon ku tin eksperensia di organisá aktividat, i ku tin un sitio históriko den nan bario ku ta importante pa nos patrimonio nashonal,mèldu boso mes na Kas di Kultura. Nos ta invitá bo pa tuma kontakto ku sra. Ninotszka Vicento na number di telefòn 434 7310. Gustosamente e ta sinta ku bo(so), p’asina yega na un plan konkreto di koperashon mutuo.
Tur sobra persona por tuma kontakto ku sra. Cathy Leito na number di telefòn 434 7316.
Siman di Kultura mester di bo aporte. Ban forma un union rondó di Siman di Kultura p’asina huntu nos organisá un eksitoso Siman di Kultura.

%d bloggers like this: