KOMUNIKADO DI KUERPO POLISIAL KÒRSOU Tiroteo ku saldo di kuater(4) morto i seis(6) herido

KOMUNIKADO DI KUERPO POLISIAL KÒRSOU
307 / 2017
7 ougùstùs 2017
Tiroteo ku saldo di kuater(4) morto i seis(6) herido
Departamentu di Komunikashon i Prevenshon

KUERPO POLISIAL KÒRSOU SIRBI I PROTEHÁ

Djaluna 7 ougústús 2017 sentral di polis a haña notifikashon ku tin un tiramentu na
Jamaicaweg na altura di un edifisio ku no ta den uzo i ku tin diferente herido.
Na yegada di e promé patruya polisial nan a topa ku un kantidat di persona drumí abou na e
sitio indiká i den bisendario.
For di un investigashon preliminar ku polis a realisá na e sitio, nan a haña informashon ku
un ratu promé un grupo di hòmber tabata sintá den e balkon di e edifisio i dado momento
un outo koló skur a yega na e sitio i un òf mas persona a baha for di e outo i a lòs un
kantidat grandi di tiru dirigí riba e grupo di hòmber aki i otro(nan) den serkanía. Despues di
e akto aki e outo a kore bai ku velosidat haltu.
Resultado di e tiroteo aki a laga un saldo di kuater(4) víktima(maskulino) ku a fayesé na e
sitio mes.
Seis(6) otro víktima (maskulino) di respektivamente 26, 28, 31, 34, 50 i 52 aña di edat a
haña herida di bala na diferente parti di nan kurpa i a keda transportá ku urgensia pa
Poliklínika di hospital pa asistensia médiko.

Tres di e kuater víktimanan ku a fayesé ta identifiká:
 Ethly Albertus jr. nasé na Kòrsou 26 sèptèmber 1989
 Jose Luis Belen, nasé na Sto. Domingo 7 ougústús 1995
 Luis Jose Belen, nasé na Sto. Domingo 7 ougústús 1995

Den kurso di dia ta identifiká e di kuater víktima ofishalmente.

Na e sitio polis a haña i konfiská un kantidat grandi di huls. Dòkter di polis a konstatá morto
di e kuater víktimanan.
Riba òrdu di Fiskal di Ministerio Públiko a konfiská e kurpanan sin bida i un vehíkulo ku
tabatin na sitio ku perforashon di bala pa mas investigashon.
Mas lat a drenta informashon ku na altura di shut tin un vehíkulo ku probablemente e
sospechoso(nan) a uza na e asesinatonan na Jamaicaweg na kandela. Polis a bai na e sitio i
a konstatá ku enberdat tin un vehíkulo na kandela. Despues ku a paga e kandela polis a
konfiská e vehíkulo pa mas investigashon.
Nos ta supliká komunidat pa si nan ta disponé di informashon ku por yuda den solushon di
e kaso aki pa duna polis e informashon aki na telefòn 917(24 ora pa dia) òf 108(number
anónimo, kaminda bo anónimidat ta garantisá)

%d bloggers like this: