Brantwer Kòrsou durante dos siman a paga ocho kandela na Veeris Sende kandela di forma intenshonal ta kastigabel pa lei

Brantwer Kòrsou durante dos siman a paga ocho kandela na Veeris
Sende kandela di forma intenshonal ta kastigabel pa lei

WILLEMSTAD – Durante di e ultimo dos siman ku a transkuri, Kuerpo di Brandweer Kòrsou a tuma nota ku den forma frekuente nan mester akudí den e area di Veeris pa mondi òf kas na kandela. Esaki ta trese komo indikashon na Brandweer Kòrsou ku den e area enkuestion posiblemente lo mester tin un òf mas persona ku ta hasi nan mes kulpabel na sende kandela di forma intenshonal den e area.
Kuerpo di Brandweer Kòrsou ta lamentá ku durante di un periodo di 2 siman, ya ta di 8 kandela den e area ku Brandweer Kòrsou a akudí pa paga, kual ta pone ku kuerpo di Brandweer ta usa hopi awa pa paga esaki. Mas aleu, hopi no ta konsiente ku na momentu ku Brandweer Kòrsou ta pagando kandela i ta usa awa, ta pone ku Brandweer Kòrsou ta okupá ku un mondi i ta opstakulisá ku no tin awa na momentu ku surgi kualkier otro situashon di emergensia.
Brandweer Kòrsou ta indiká ku sendementu di kandela di forma intenshonal, tin kastigu di lei mará na dje. Esaki di akuerdo ku kódiko penal artíkulo 2:98 te ku 2:100 sendementu di kandela di forma intenshonal kaminda tin peliger pa bienes (goederen) òf pa hende.

Artikulo 2:98 di kódiko penal ta indiká ku:
Esun ku di forma intenshonal sende kandela, okashoná un eksploshon òf kousa un inundashon ta risibi kastigu:
a. Di prizon maksimo di 12 aña òf un montante di but di kategoria 5, (te ku Ang.100.000,- florin) na momento ku esaki ta forma peliger pa propiedatnan di otro.
b. Di prizon maksimo di 15 aña òf un montante di but di kategoria 5, na momento ku esaki ta forma peliger pa bida di otronan òf ta forma peliger pa dañonan fisikó na un tercera
c. Di prizon maksimo di bida largu òf un montante di but di kategoria 5, na momento ku esaki a kosta bida di un persona

Di akuerdo ku e lei ku ta rekarda asuntunan ambiental, Eilandsverordening 1980, Art. 46 : Ta prohibí pa sende kandela den distrito di siudat sin un pèrmit di Gobièrnu den kura di kas, òf riba via publiko. Fuera di artikulo 30,37 i 46 di eilandsverordering 1980, artikulo 47, insiso 2 ta indiká ku ta prohibí pa sende kandela òf laga sende òf mantene kandela na momentu ku esaki ta kousa daño, molèster òf molèster na tersera.

Mas aleu Brandweer Kòrsou a pidi outoridatnan pa inisiá e proseso di investigashon pa determiná ken ta esnan ku ta hasi nan mes kulpabel na e akto aki. Si tin kualkier personá den e área ku ta dispone di informashon relashoná ku esnan ku ta hasi nan mes kulpabel na sende kandela, porfabor duna e informashon aki na Kuerpo Polisial Kòrsou na telefòn 917 òf e number anónimo 108.

%d bloggers like this: